Actividades

Ben, pois agora, toca ir á práctica: Para aprender a ler a prensa, imos ler a prensa. Imos comprobar algún dos aspectos que estivemos comentando.

1. De verdade criches que os xornais non contan as noticias segundo lles interesa aos seus donos? Non ho!!! Comproba as portadas de todos os xornais galegos do día de hoxe e decide por ti mesmo/a. Tranquilo/a non tes que ir de compras, abonda con que entres neste quiosco: http://kiosko.net/
   Toma nota de que novas destaca cada xornal na súa portada, a cales se lles dá maior importancia e entre todos e todas extraede conclusións...
   
   

2. Agora imos co tema da lingua... debedes intentar conseguir unha mostra de cada un dos xornais tradicionais de Galicia, dá igual a data (La Voz, El Correo, Faro de Vigo, Atlántico, Diario de Pontevedra, El Progreso, La Región...). Por grupos dividirédesvos de maneira que revisedes a totalidade deses periódicos en busca das noticias que atopedes en galego. Facede unha posta en común dos datos que conseguistes e intentade sacar algunha conclusión.
   
   
3. Agora toca empregar os medios que usan a nosa lingua. Que hai que facer? Realizar un percorrido polos xornais de información xeral (Praza, Sermos Galiza, Galicia Confidencial) e anotar as noticias que vos resultan máis interesantes. Logo facede unha posta en común: todos coincidistes na vosa selección ou hai tantas lecturas como alumnos/as?
   
   
4. Botádelle agora un ollo ao xornal en galego que fala da zona máis próxima a vós (Compostela, Val Miñor, A Terra Cha... a que sexa...) sabiades da súa existencia? Recolle as mesmas noticias que os outros de información xeral? Por que?
   
   
5. Isto é máis prolongado no tempo, é unha actividade para facer no resto dos vosos días: lede a prensa e... sede críticos/as!!