Para o procesamento de imaxes temos que botar man de programas específicos de tratamento fotográfico, tales como Photoshop, PixelInsight ou MaxIm DL5.
Ver máis...Ocultar...
Procesamento de imaxes astronómicas. Pasos a seguir
MaxIm DL5
1. Calibrar as imaxes. Escoller darks en Set Calibration e logo aplicar a tódalas imaxes Calibrate All ou unha a una Calibrate.
2. Converter as imaxes en branco e negro a cor. En Convert Raw to color escóllese a cámara e o balance ponse en auto.
3. Amoreado. Para o amoreado prémese Stack e escóllense as imaxes que se van sumar en Select, en Align, Mode escóllese unha de dúas:
• Auto – Star Matching. Neste caso dámoslle a seguinte imaxe e escollemos unha estrela que ha servir como referencia.
• Manual 1 star – Shift only. Aquí dámoslle a seguinte imaxe, escollemos unha estrela e imos pasando as distintas imaxes marcando esa mesma estrela.
• Manual 2 star. Úsase cando, facéndoo manualmente, as imaxes non teñen a mesma orientación todas elas.
En Combine escóllese Average e procésase.
4. Aquí xa podemos gardar a imaxe. Convén escoller manualmente o rango dinámico co fin de non perder información nunha fase tan temperá do proceso. Abrimos Levels; podemos desmarcar Log Scale se a visualización parece mellor. Poñemos en cero o histograma polo lado esquerdo (triángulo vermello); isto fai máis claro o fondo da imaxe pero evita que se perda información; polo lado dereito (triángulo azul) pódese recurtar o histograma naquela zona na que non haxa dato ningún. Agora gardamos a imaxe.
5. Pode ser interesante procesar a imaxe con Histogram Specification (antes ou despois do procesamento anterior), pois dá unha versión alternativa.
6. Se a imaxe se garda sen aplicar Levels en stretch hai que desmarcar auto e premer o botón Stretch. Aparece entón un cadro de diálogo no que se escolle: Linear Only, Screen Stretch, Output range 16bit. Facer isto cada vez que se garda (non almacena os valores).
PixelInsight LE
1.-Recorte do fotograma e axustes iniciais do histograma.
Se no amoreamento os bordos non coincidiron perfectamente cómpre recortar a imaxe. Para iso usamos a ferramenta Crop.
Logo pasamos ó recorte inicial de tódalas canles que forman o histograma. Abrimos Histograma e escollemos nel a imaxe que imos tratar.
O seguinte paso é recortar as canles usando Auto Clip; dado que os valores por defecto do programa son un chisco conservadores, premendo Ctrl o botón Auto Clip convértese en Setup, permitíndonos modificar os valores, tanto de sombras coma de luces a 0.010
Antes de continuar sempre hai que resetear os valores para que non se apliquen acumulativamente á imaxe. Premendo Ctrl o botón Reset convértese en Reset All, que permite resetear todo nunha única acción.
Picando co botón dereito na imaxe (ou usando a icona) abrimos View/Statistics
Os datos que nos interesan a nós son os da mediana (Median) para cada unha das canles. Copiamos os datos da mediana, canle por canle, en Midtones; á canle combinada RGB asignámoslle un valor de Midtones de 0.875. A imaxe xa está preparada para o paso seguinte.
2.-Uso de DBE para eliminación do ruído no fondo da imaxe. Corrección do viñeteo.
Este proceso permite eliminar o viñeteo e os efectos da contaminación lumínica. Seleccionamos a ferramenta DBE e empezamos a deixar puntos sobre a imaxe, evitando as estrelas e as nebulosas, galaxias, etc. Logo picaremos na pestana Global e utilizaremos unha tolerancia media (Tolerance) de entre 0.375 ata 0.600, dependendo do agresivos que queiramos ser. Ó premer Generate aparece un modelo de fondo que usaremos para corrixir a imaxe orixinal.
O que imos facer é restar este modelo á imaxe escalando o resultado (para non perder rango dinámico). Abrimos Pixel Math, prememos New e escollemos en Operator SUB: Subtract; en Operand escollemos a imaxe que se vai restar; marcamos o cadro Rescale. Finalmente aplicamos e xa está.
3.-Uso das máscaras para protexer elementos da imaxe.
As máscaras permiten protexer as estrelas, o fondo ou as cores para que cando actuamos sobre algún elemento este non afecte os demais.
A luminancia é a canle onde está todo o corpo da foto, tódolos detalles; cando queremos elevar a luminosidade da imaxe, se non protexemos as estrelas estas saturaranse e perderán a súa cor orixinal, e asemade aumentan de tamaño. Para evitar isto aplícase unha máscara extraendo a luminancia e invertíndoa; así, as estrelas e o núcleo das galaxias e nebulosas aparecerán negras (luminancia invertida) e os procesos que apliquemos á imaxe non afectarán a esas zonas.
Para extraer a luminancia prememos Process/color spaces/extract channels e a continuación seleccionamos o conxunto CIE L*a*b* e deshabilitamos a* e b* deixando habilitada a canle L* (Luminancia).
3.1. Modificación da máscara de luminancia.
Unha vez extraída a luminancia con wavelets eliminaremos todo o que non sexan estrelas. Cómpre poñer como número de canles 6, desactivar a capa R e darlle un Bias de 0,1 a tódalas demais canles; en Noise Thresholding poñemos 0,1 e un Amount de 1.
Tras este procesamento cómpre desenfocar lixeiramente as estrelas, para o que en wavelets desactivamos a capa 1 e na capa dúas poñemos un Bias de -1 (desactivar Noise Thresholding).
Entón, mediante o histograma eliminamos tódolos restos da nebulosa (ou galaxia) desprazando o nivel de sombras á dereita e compensando movendo os medios tons pouco a pouco cara á esquerda.
Finalmente, para que o tamaño das estrelas sexa o axeitado podemos aplicar o Filtro Mínimo/Máximo, que permite agrandar (Dilation) ou diminuír (erosion) o tamaño das estrelas.
3.2. Aplicación da máscara.
Para inverter a imaxe prememos Image/Invert.
Para aplicar a máscara prememos Mask/select mask e escollemos a imaxe coa luminancia invertida como máscara. Podemos ver a máscara premendo o cadro Mask Shown (aínda que este estea desactivado e non vexamos a máscara, esta seguirá actuando ata que a desactivemos (cadro Enabled).
Agora xa podemos aplicarlle á imaxe o proceso que queiramos sen que as zonas protexidas pola máscara se saturen.
Tamén podemos crear unha máscara sobre unha canle de cor para protexer esta cor cando actuemos sobre as demais. Para iso en vez de seleccionar CIE L*a*b* seleccionaremos RGB e extraeremos a canle sobre a que imos actuar; ó invertela a máscara protéxenos as outras cores distintas á que extraemos; se non a invertemos protexe esa única cor. Recordemos sempre que unha máscara invertida protexe os obxectos brillantes (luces) e que unha máscara sen inverter protexe os obxectos escuros (sombras).
4. Uso das curvas para retocado da imaxe.
Tras poñer a máscara xa se poden tratar as curvas de luminosidade. Abrir Curvas. Convén marcar RT (Tempo real) para que os cambios se vaian vendo aplicados á imaxe.
Na parte alta da liña están as luces altas, os medios tons no medio e as baixas abaixo. Hai que ir tocando cada canle de cor por separado. L indica a luminancia total, S a saturación.
5.-Redución do ruído na canle verde.
A aplicación desta técnica parte da base de que no ceo non se dá a cor verde de xeito illado, por tanto eliminar a cor verde é eliminar ruído. Para esta técnica usamos a ferramenta SCNR. Ó activar esta ferramenta podemos escoller a canle sobre a que se vai actuar (normalmente a verde) e podemos escoller catro opcións:
• Maximum Mask.
• Additive Mask.
• Average Neutral.
• Maximum Neutral.
As dúas primeiras son máis agresivas e soen deixar como resultado un fondo de cor maxenta na imaxe; é por iso que teñen a posibilidade de decidir en que medida se aplica, debéndose seleccionar con moito coidado este valor.
As opcións neutrais non teñen ese efecto de cor pero son moito menos agresivas.
6.-Procesado de estruturas a gran escala para tratamento de nebulosas e galaxias.
O que imos facer agora é deixar unha nebulosa sen estrelas para poder actuar sobre ela sen actuar sobre as estrelas. Para isto usaremos a ferramenta wavelets.
Primeiro hai que aumentar o número de canles ata chegar a 32bit; para iso ponse Count a 6, e utilízase a opción Dyadic. Debemos entón desactivar a capa R (dobre click sobre ela) e aplicar. Temos entón unha imaxe con estrelas e sen nebulosa.
Para obter unha imaxe da nebulosa o que facemos é restar a imaxe anterior á imaxe orixinal mediante Pixel Math; escollemos SUB, en Operand a imaxe das estrelas e desmarcamos a opción Rescale; ó aplicar temos unha imaxe só coa nebulosa.
Ó final do proceso volvemos engadir as estrelas en Pixel Math co método ADD e con Rescale activado.
Para procesar a nebulosa mediante wavelets engadimos tres canles máis (Count = 9). Estas tres canles están por enriba de 32bits, polo que son as que conteñen a nebulosa. Na canle 7 poñemos un Bias=0.1, Amount=0, Deringing Amount=0.6 e Threshold=0.015; repetimos o mesmo nas canles 8 e 9). Aplicar. Podemos logo modificar as curvas.
7.-Redución de ruído de grandes estruturas.
SGBNR permite reducir o ruído de gran escala dentro da imaxe.
O algoritmo SGBNR pode ser aplicado individualmente a cada canle RGB ou ser aplicado á luminancia e crominancia por separado. Hai tres modelos:
• RGB/K. É o modelo por defecto e o máis simple.
• CIE L*|a*b*. Este modelo emprega uns parámetros para a luminancia (L) e outro independente para a crominancia (a+b).
• CIE L*|a*|b*. Este modelo emprega uns parámetros independentes para cada unha das canles. É un método para usuarios expertos.
O filtro Low Pass Filter é un filtro de desenfoque con perfil gaussiano e emprégase para suavizar a imaxe. StdDev define o tamaño do filtro en píxeles; valores elevados introducen fortes suavizados na imaxe; o normal é usar valores dende 0,5 (CCD de alta resolución) ata 2,5 píxeles. Amount controla a intensidade coa que se aplica o filtro. Iterations define a cantidade de veces que se usan os valores anteriores; dá mellores resultados usar valores de intensidade moderados e aplicar varias iteracións.
A protección de bordos (Edges Protection) actúa para evitar perdas de nitidez nos detalles cando actúa o filtro, e pódese activar separadamente para as sombras e para as luces. Threshold controla o umbral de intensidade de protección; valores baixos protexen máis os detalles, pero se son demasiado altos ou baixos poden xerar artefactos; a maior valor de Iterations máis crítico é o valor deste parámetro. Overdrive aumenta o valor de protección cando se aumenta o seu valor; ás veces pode producir artefactos, polo que convén deixalo nestes casos en cero.
A máscara de luminancia ten dous parámetros: Clipping dá un maior ou menor nivel de protección ó recortar na máscara os extremos do histograma; os valores de axuste son entre 0 e 0.80. Gamma permite axustes entre 0.1 e 3.0, controlando a suavidade de transición entre as zonas que serán enmascaradas durante a redución de ruído.
Ocultar...